ശീമക്കൊന്നയെ ഇന്നെത്രപേര്‍ക്കറിയാം?
ഒരുകാലത്ത് നാം ചുവന്ന പരവതാനിവിരിച്ച് ആനയിച്ച ചെടിയാണിത്. അമ്പത്തഞ്ചുവര്‍ഷം മുമ്പ്, കേരളസംസ്ഥാനം രൂപംകൊണ്ടകാലത്ത്, രാസവളത്തിനു ക്ഷാമവും തീവിലയും വന്നകാലത്ത് അന്നത്തെ ഇഎംഎസ് മന്ത്രിസഭ ശീമക്കൊന്നയെ ജനപ്രിയമാക്കാന്‍വേണ്ടി ശീമക്കൊന്നവാരം തന്നെ ആചരിച്ചിരുന്നു. അതിനെത്തുടര്‍ന്ന് നമ്മുടെ തെങ്ങിന്‍തോപ്പുകളും വയലതിരുകളിലും ശീമക്കൊന്നകള്‍ നിരനിരയായി വളര്‍ന്നുനിന്നു. എല്ലാം തികഞ്ഞ ഒരു ജൈവവളമായി ശീമക്കൊന്ന. പിന്നെപ്പോഴോ നാം അതിനെ മറന്നു. ഇപ്പോള്‍ ശീമക്കൊന്നയെ തിരികെക്കൊണ്ടുവരാന്‍ കൃഷിവകുപ്പ് വീണ്ടും പ്രചാരണം ആരംഭിച്ചിരിക്കുന്നു. ഇക്കഴിഞ്ഞ ദിവസം ജൈവകാര്‍ഷികമിഷന്റെ ഒരു യോഗത്തില്‍ കൃഷിമന്ത്രി ശീമക്കൊന്ന കേരളത്തിലെത്തിയ ചരിത്രമോര്‍ത്തു.
എന്തുകൊണ്ടാണ് ശീമക്കൊന്ന വീണ്ടും ചിത്രത്തിലെത്തുന്നത്? എന്തിനാണ് ശീമക്കൊന്നയെ തിരികെക്കൊണ്ടുവരുന്നത്? ഇത്രയധികം ജൈവവൈവിധ്യം നിറഞ്ഞ ഒരു നാട്, ‘ശീമേ’ന്ന് (outside the country )വന്ന ഒരു ചെടിയ എന്തുകൊണ്ട് ആശ്ലേഷിച്ചു. ചിന്തിച്ചിട്ടുണ്ടോ?
ശീമനെല്ലി, ശീമച്ചക്ക എന്നൊക്കെ അറിയപ്പെടുന്ന ചെടികൾ നമ്മൾ വളർത്തുന്നുണ്ട്. ‘പേരി’ൽ നിന്നുതന്നെ അറിയാം അവരുടെ ‘വേരു’കൾ. ബംഗാളിയിൽ ‘സാരംഗ’, തെലുങ്കിൽ ‘മാദ്രി’, മറാത്തിയിൽ’ ഗിരിപുഷ്പ’, ‘തമിഴിൽ ‘ശീമെയ് അഗത്തി’ എന്നൊക്കെയാണ് ശീമക്കൊന്നയുടെ പേരുകൾ. വരവ് മധ്യഅമേരിക്കയിലെ മെക്സിക്കോ -പെറു എന്നിവയടങ്ങുന്ന ഭൂവിഭാഗത്തിൽ നിന്ന്. ഇന്നു ലോകത്തെവിടെയും ഇയാളെ നമുക്കുകാണാം. Glyricidia maculata, Glyricidia sepium എന്നിങ്ങനെ വിവിധ സ്പീഷീസ്സുകൾ ഉണ്ട്.
കർഷകർ എന്തുകൊണ്ട് കൃഷിയിടങ്ങളിൽ ശീമക്കൊന്നകൾ നട്ടുപിടിപ്പിക്കണം എന്നുപറയുന്നു? നമുക്ക് പരിശോധിക്കാം.
- പയർവർഗച്ചെടികളുടെ തറവാടായ Leguminosae കുടുംബത്തിലെ Fabaceae എന്ന തായ് വഴിയിലെ അംഗമാകയാൽ വേരുകൾക്ക് നൈട്രജൻ യൗഗീകരണ (Nitrogen Fixation ) ശേഷിയുണ്ട്. സാധാരണചെടികൾ മണ്ണിന്റെ പോഷകങ്ങൾ ‘ഊറ്റു’മ്പോൾ, ശീമക്കൊന്ന മണ്ണിന്റെ വളക്കൂറിനെ ‘ഊട്ടുന്നു’!
- ശീമക്കൊന്നയുടെ ഇലകളിൽ ഏതാണ്ട് 2.8% നൈട്രജനും 0.1% ഫോസ്ഫറസും 1.8% പൊട്ടാസ്യവും അടങ്ങിയിരിക്കുന്നു. കൂടാതെ കാൽസ്യം, മഗ്നീഷ്യം, സൂക്ഷ്മമൂലകങ്ങൾ, പോളിഫീനോൾസ്, ടാനിനുകൾ എന്നിവയും യഥേഷ്ടം. ഇവ അഴുകിച്ചേരുമ്പോൾ മണ്ണ് പോഷകസമ്പുഷ്ടമാകുന്നു.
- വേഗത്തിൽ മണ്ണിൽ അഴുകിചേരാനുള്ള തരളത (sacculency) ഇതിന്റെ ഇലകൾക്കുണ്ട്.
- മണ്ണിനെ കാർബൺ സമ്പുഷ്ടമാക്കുന്നു.
- മണ്ണിന്റെ കാർബൺ -നൈട്രജൻ അനുപാതം (C:NRatio) ശക്തവും പോഷക ആഗിരണത്തിനു അനുകൂലവുമാക്കുന്നു.
- കമ്പുകൾ വഴി എളുപ്പത്തിൽ നട്ടുപിടിപ്പിക്കാൻ കഴിയുന്നു.
- വർഷത്തിൽ മൂന്നോനാലോ തവണ ഇലകൾ വെട്ടിയെടുക്കാം. വെട്ടിയാലും ഇലകൾ വേഗത്തിൽ വളർന്നുവരും.
- കാപ്പി, കൊക്കോ പോലെയുള്ള ചെടികൾക്ക് ഭാഗികമായി തണൽകിട്ടാൻ ഇത് നട്ടു കൊടുത്താല്‍മതി.
- ആടുകൾക്ക് നല്ല തീറ്റയാണ് ശീമക്കൊന്ന. ഉണക്കപദാർത്ഥത്തിന്റെ (Dry matter) നാലിൽ ഒന്നും മാംസ്യ(Crude പ്രോട്ടീൻ )ആണ്. വെയിലത്തുവാട്ടി പശുക്കൾക്കും കൊടുക്കാം, അവ തിന്നുമെങ്കിൽ.
- കുരുമുളകുചെടികൾക്ക് പറ്റിയ താങ്ങുമരമാണ് ശീമക്കൊന്ന. വിളവെടുക്കാൻ എളുപ്പവും.
- വാനിലവള്ളികൾ പടർത്താനും നല്ലത്.
- ജൈവ വേലി (Bio Fencing )യാക്കാനും ഉത്തമം.
- മണ്ണിൽവീഴുന്ന പ്രായമായ ഇലകൾ മണ്ണിന്റെ ജൈവാംശം (ഹ്യൂമസ്) വർധിപ്പിക്കുന്നു. മണ്ണൊലിപ്പ് തടയുന്നു. മണ്ണിന്റെ ഘടന മെച്ചപ്പെടുത്തുന്നു.
- നല്ല പ്രായമുള്ള മരങ്ങളുടെ കാതൽ ഉറപ്പുള്ള തടിയായി, ഫർണിച്ചറുകൾ ഉണ്ടാക്കാൻ പ്രയോജനപ്പെടുത്താം.
അങ്ങനെ എത്രയെത്ര ഉപയോഗങ്ങൾ. ശരിക്കും ഒരു വിവിധോപയോഗച്ചെടി (Multi utility Plant) എന്നുതന്നെ വിശേഷിപ്പിക്കാം. ഇങ്ങനെയുള്ള ഒന്നിനെ ദീർഘവീക്ഷണമുള്ള ഭരണാധികാരികൾ പ്രോത്സാഹിപ്പിച്ചില്ലെങ്കിലേ അത്ഭുതമുള്ളൂ.
ഇപ്പോള്‍ മനസ്സിലായല്ലോ ശീമക്കൊന്ന ആരാണെന്ന്? ഇത്രയുമറിഞ്ഞിട്ടും കുറേ ശീമക്കൊന്നകൾ നട്ടുപിടിപ്പിക്കാന്‍ ശ്രമിക്കാത്തവരില്‍ ഈ നാട് ഒരു പ്രതീക്ഷയും വച്ചുപുലര്‍ത്തേണ്ടതില്ല. ഇത്രയേ പറയാനുള്ളൂ.
വാല്ക്കഷ്ണം:
പറയാനുള്ള രണ്ടുകാര്യങ്ങള്‍ വിട്ടുപോയി.
ഒന്ന്, ആടിനും പശുവിനുമൊക്കെ ശീമക്കൊന്നയുടെ ഇലകൾ പഥ്യമാണെങ്കിലും എലികൾക്ക് ഇതിന്റെ ഇലയും തൊലിയും വിഷമാണ്. ‘Glyricidia ‘എന്നാണ് ശീമക്കൊന്നയുടെ ശീമയിലെപ്പേര്. ആ വാക്കിന്റെ അർത്ഥം തന്നെ എലികളെ കൊല്ലുന്നത് എന്നാണ്. മരച്ചീനിക്കർഷകർ നോട്ട് ചെയ്തോളൂ. ശീമക്കൊന്നയുടെ ഇലകളിട്ട് തിളപ്പിച്ച വെള്ളത്തിൽ എലികൾക്ക് ഇഷ്ടമുള്ള ഭക്ഷണങ്ങൾ കുതിർത്ത് കൊടുത്തുനോക്കൂ. നൈസായി കൊലപാതകം നടക്കും.
രണ്ടാമത്തെക്കാര്യം. ചില പ്രദേശങ്ങളിൽ ഈ ശീമക്കാരന്‍ തന്റെ അധിനിവേശ സ്വഭാവം (Invasive nature )കാണിച്ചിട്ടുള്ളതായി റിപ്പോര്‍ട്ടുണ്ട്. പക്ഷേ, കേരളത്തിൽ അങ്ങനെ ചെയ്തതായി ചരിത്രമില്ല. മഞ്ഞക്കൊന്ന (Senna spectabilis )എന്ന ചെടി നമ്മുടെ കാടിനും കാട്ടുജീവികള്‍ക്കും ഭീഷണിയായി മാറിയയോര്‍ക്കുമ്പോള്‍ ഈ സായിപ്പന്‍ചെടിക്ക് നമ്മള്‍ കെട്ടിപ്പിടിച്ചൊരുമ്മ കൊടുക്കണം