മൃഗസംരക്ഷണ വകുപ്പിന്റെ പദ്ധതികൾ ക്ഷീരകർഷകരുടെ വീട്ടുപടിക്കൽ എത്തിക്കുന്നത് ലക്ഷ്യമിട്ട് ആരംഭിച്ചിട്ടുള്ള എ – ഹെൽപ് (അക്രെഡിറ്റഡ് ഏജൻറ് ഫോർ ഹെൽത്ത് ആൻഡ് എക്സ്റ്റൻഷൻ ഓഫ് ലൈവ്സ്റ്റോക്ക് പ്രൊഡക്ഷൻ ) പദ്ധതിയുടെ ജില്ലാതല ഉദ്ഘാടനവും, പരിശീലന പരിപാടിയും ആരംഭിച്ചു. നാല്പത്തിരണ്ട്‌ ദിവസത്തെ പശുസഖി പരിശീലനം പൂർത്തിയാക്കിയ വനിതകൾക്കാണ് ആദ്യ ഘട്ടത്തിൽ പരിശീലനം. പൊതുവിൽ ആരോഗ്യ വകുപ്പിലെ ആശാവർക്കർമാരെപ്പോലെയാകും ഇവരുടെ പ്രവർത്തനം. ട്രെയിനിങ് പൂർത്തിയാക്കിയ ശേഷം നാഷണൽ അക്കാദമി ഓഫ് ആർ .എസ് .ഇ .ടി .ഐ നടത്തുന്ന പരീക്ഷയും വിജയിക്കേണ്ടതുണ്ട്. കർഷകർക്ക് അറിവ് പകർന്നു കൊടുക്കുവാൻ കഴിയുന്ന വിധത്തിൽ മൃഗസംരക്ഷണ മേഖലയിലെ വിവിധ വിഷയങ്ങളെകുറിച്ചാണ് ഇവർക്ക് പരിശീലനം നൽകുന്നത്.
മൃഗസംരക്ഷണ വകുപ്പിന്റെയും കർഷകരുടെയും ഇടയിലുള്ള പ്രധാന കണ്ണിയായി എ -ഹെല്പ് പ്രവർത്തിക്കും. വിജ്ഞാനവ്യാപന പ്രവർത്തനങ്ങൾക്കുള്ള അറിവുകൾക്കൊപ്പം പ്രായോഗിക പരിശീലനങ്ങളും ഇവർക്ക് നൽകുന്നുണ്ട് .മൃഗാരോഗ്യസംരക്ഷണം കന്നുകാലികളുടെ പ്രത്യുൽപാദന പരിപാലനം, തീറ്റ പരിപാലനം, ശുദ്ധമായ പാലുല്പാദനം, പുൽകൃഷി, പ്രഥമ ശുശ്രുഷ കേന്ദ്ര – സംസ്ഥാന സർക്കാരുകളുടെ വിവിധ പദ്ധതികളെ കുറിച്ചുള്ള വിവരങ്ങൾ കന്നുകാലികളെ ഇൻഷ്വർ ചെയ്യുന്നതിനും ബാങ്കുകളിൽ നിന്നും ലോൺ ലഭ്യമാകുന്നതിനു വേണ്ട സൗകര്യങ്ങളൊരുക്കൽ, രോഗപ്രതിരോധ കുത്തിവെയ്പിനുവേണ്ട സഹായം നൽകൽ, കന്നുകാലികൾക്ക് തിരിച്ചറിയൽ കമ്മൽ ഘടിപ്പിക്കൽ തുടങ്ങിയ വിവിധ പ്രവർത്തനങ്ങളിൽ എ – ഹെൽപ് മുഖ്യ പങ്കു വഹിക്കും. പഞ്ചായത്തു തലത്തിൽ മൃഗാശുപത്രികളുമായി ബന്ധപ്പെട്ട് പ്രവർത്തിക്കുന്ന എ ഹെൽപ് മൃഗസംരക്ഷണ വകുപ്പിന്റെ വിവിധ പ്രവർത്തനങ്ങൾ കർഷകരുടെ വീട്ടുപടിക്കൽ എത്തിക്കുന്നതിനും കർഷകർക്ക് മൃഗാശുപത്രികൾ മുഖാന്തിരം ലഭിക്കേണ്ട സേവനങ്ങൾ ഉടനടി ലഭ്യമാക്കുന്നതിനുമുള്ള പ്രധാന ഇടനില പ്രവർത്തകരാണ്. പഞ്ചായത്തിലെ വിവിധ പ്രദേശങ്ങളിൽ ആവശ്യാനുസരണം ബോധവൽക്കരണ ക്യാമ്പുകൾ സംഘടിപ്പിക്കുന്നതിനും, എ – ഹെൽപ്പിന്റെ സേവനം ഉപകരിക്കും.