വിത്താണ് കൃഷിയുടെ അടിസ്ഥാനം. വിതച്ചതേ കൊയ്യൂ എന്ന് പഴമക്കാര്‍ പറയുന്നത് വിത്തിന്റെ പ്രാധാന്യം മനസ്സിലാക്കിയതുകൊണ്ടാണ്. ജനിതകശുദ്ധിയും ഉല്പാദനക്ഷമതയും ഒത്തുചേര്‍ന്നവയാകണം വിത്ത്.
പച്ചക്കറിവിത്തുല്പാദനവും നല്ല വരുമാനമാര്‍ഗമാണ്. നല്ല വിത്ത് ഉണ്ടായാല്‍ മാത്രം പോരാ, അതു സൂക്ഷിച്ചുവച്ച് നടുന്നതുവരെയുള്ള എല്ലാ ഘട്ടങ്ങളിലും ശ്രദ്ധ ആവശ്യമാണ്. അങ്ങനെ ചെയ്താല്‍ ഗുണമേന്മയുള്ള വിത്തുകള്‍ നിര്‍മ്മിക്കാനാകും. വാണിജ്യാടിസ്ഥാനത്തിലുള്ള വിത്തുല്പാദനത്തിന് മൂന്നുഘട്ടങ്ങളാണുള്ളത്.
- വിത്തുല്പാദനം
- വിത്തുസംസ്ക്കരണം
- വിത്തുസംഭരണം.
വിത്തുല്പാദനം
കേരളത്തിൽ പച്ചക്കറിവിത്തുകള്‍ ഉല്പാദിപ്പിക്കാന്‍ പൊതുവെ നല്ല സമയം സെപ്റ്റംബർ മുതൽ ജനുവരി വരെയുള്ള മാസങ്ങളാണ്. മികച്ച വിത്തുലഭിക്കാന്‍ പാലിക്കേണ്ട നിര്‍ദ്ദേശങ്ങള്‍ എന്തൊക്കെയാണെന്ന് നമുക്കുനോക്കാം. - വിത്തെടുക്കുന്ന വിളയുടെ പ്രത്യേകതകള്‍, അവയെ ബാധിക്കുന്ന രോഗകീടബാധകള്‍, അവയുടെ നിയന്ത്രണമാര്‍ഗങ്ങള്‍ ഇവയെക്കുറിച്ചൊക്കെ നല്ല ധാരണ ഉല്പാദകനുണ്ടായിരിക്കണം.
- വിത്തുല്പാദനത്തിന് തിരഞ്ഞെടുക്കുന്ന സ്ഥലം നല്ല സൂര്യപ്രകാശം ലഭിക്കുന്നതായിരിക്കണം. നീർവാർച്ചയും വളക്കൂറും ഉള്ളതായിരിക്കണം. മണ്ണിലൂടെ പകരുന്ന രോഗകീടങ്ങളിൽനിന്ന് വിമുക്തമായിരിക്കുകയും വേണം.
- വിത്തുല്പാദനത്തിന് ഉപയോഗിക്കുന്ന വിത്ത് വിശ്വാസയോഗ്യമായ സ്ഥലത്തുനിന്ന് വാങ്ങിയതായിരിക്കണം.
- ഒരേ ജനുസ്സിൽപ്പെടുന്ന വ്യത്യസ്തയിനങ്ങൾ തമ്മിൽ വേണ്ടത്ര സുരക്ഷിതമായ അകലം പാലിച്ചിരിക്കണം.
- രോഗം ബാധിച്ച തൈകള്‍ തുടക്കത്തില്‍ത്തന്നെ പറിച്ചുനശിപ്പിക്കാൻ പ്രത്യേകം ശ്രദ്ധിക്കണം. കൃഷിത്തോട്ടത്തിലെ കളകൾ നശിപ്പിച്ച് ശുചിത്വം പാലിച്ചാല്‍ നല്ലയളവുവരെ രോഗങ്ങൾ ഒഴിവാക്കാം. തൈയില്‍ ഏതെങ്കിലും ഭാഗത്ത് കീടങ്ങളുടെ മുട്ടകളെയോ പുഴുക്കളെയോ കണ്ടാല്‍ അവ ശേഖരിച്ച് നശിപ്പിച്ചുകളയണം.
- വിത്തിനായി നടുന്ന ചെടികളില്‍ കായവരുമ്പോള്‍ ആദ്യത്തെ ഒന്നോ രണ്ടോ തവണ മൂപ്പെത്തുന്നതിനുമുമ്പായി ആ കായ്കൾ വിളവെടുക്കാവുന്നതാണ്.
- മൂപ്പെത്താതെ പഴുത്തതോ ഉണങ്ങിയതോ ആയ കായ്കളും അവസാനത്തെ വിളവെടുപ്പില്‍ ലഭിക്കുന്ന വലിപ്പംകുറഞ്ഞ കായ്കളും വിത്തിനായി ഉപയോഗിക്കരുത്.
- മണ്ണിൽ നൈട്രജന്റെ ആധിക്യം രോഗകീടബാധകൾ വർദ്ധിപ്പിക്കുമെന്നതിനാൽ പച്ചക്കറിവിത്തുൽപാദനത്തിൽ യൂറിയ, ഫാക്ടംഫോസ്, അമോണിയം സൾഫേറ്റ് എന്നിവയുടെ പ്രയോഗം അമിതമാകാതെ ക്രമീകരിക്കണം. എന്നാൽ കായ്കളുടെ വളർച്ചാഘട്ടങ്ങളിൽ ആവശ്യമെങ്കിൽ നൈട്രജന്‍, പൊട്ടാസ്യം എന്നിവ വളമായി നൽകാം. ആവശ്യാനുസരണം ജലസേചനവും രോഗകീടനിയന്ത്രണ മാർഗ്ഗങ്ങളും കൈകൊള്ളണം.
വിത്ത് സംസ്ക്കരണം
മൂത്തുണങ്ങിയതോ പഴുത്തതോ ആയ കായ്കളിൽനിന്ന് വിത്തെടുത്ത് വേണ്ടവിധത്തിലുണക്കി അതിൽനിന്ന് നല്ല വിത്തുമാത്രം തെരഞ്ഞെടുക്കുന്ന പ്രക്രിയയാണ് ശരിയായ വിത്തുസംസ്ക്കരണം.
കേരളത്തിന്റെ പ്രത്യേകകാലാവസ്ഥയില്‍ വർദ്ധിച്ച ചൂടും അന്തരീക്ഷത്തിലെ ജലാംശവും സാധാരണമാണ്. ഇതുമൂലം പലവിധരോഗങ്ങളും കീടങ്ങളും വിത്തിനെ ബാധിക്കാനിടയുണ്ട്. വിത്തിൻ്റെ അങ്കുരണശേഷിയും തുടർന്നുള്ള വളർച്ചയും ഗണ്യമായി കുറയാം. അതിനാൽ വിത്തുസംസ്കരിക്കുന്നതിലും വിത്ത് സൂക്ഷിച്ചുവയ്ക്കുന്നതിലും പ്രത്യേകശ്രദ്ധ ആവശ്യമാണ്. - പച്ചക്കറിവിത്തുകള്‍ പൊതുവേ 6% മുതല്‍ 8% വരെ ജലാംശം നിലനില്ക്കത്തക്കവിധത്തിലാണ് ഉണക്കിയെടുക്കേണ്ടത്. കൂടുതൽ ചൂടിൽ കുറച്ചുനേരം ഉണക്കുന്നതിനേക്കാൾ നല്ലത് കുറഞ്ഞ ചൂടിൽ കൂടുതൽസമയം ഉണക്കുന്നതാണ്. ഉച്ചയ്ക്ക് 12 മണിമുതൽ 3 മണിവരെയുള്ള ശക്തിയായ വെയിലത്ത് വിത്തുണക്കുന്നത് ഒഴിവാക്കണം. പ്രത്യേകിച്ച് സിമൻ്റുതറയിലിട്ട് ഒരി ക്കലും ഉണക്കരുത്. ചാണകം മെഴുകിയ നിലത്തോ ചാക്ക്, പനമ്പ് ഇവയിലേതിലെങ്കിലും നിരത്തിയോ ഇടയ്ക്കിടയ്ക്കിളക്കി വിത്തുണക്കുന്നതാണ് അഭികാമ്യം.
- വിത്തുകള്‍ വൃത്തിയോടെ സൂക്ഷിക്കണം. കേടുവന്നതും ചെറുതുമായ ഒഴിവാക്കണം.
വിത്ത് സംഭരണം - വിത്തിനോടൊപ്പം മണ്ണും കല്ലും ചെടിയുടെയും കായ്കളുടെയും അവശിഷ്ടങ്ങളും മോശമായ വിത്തുകളും ഉണ്ടാകാറുണ്ട്. അവ പാറ്റിമാറ്റിയതിനുശേഷം വേണം വിത്തുസൂക്ഷിക്കാൻ.
- അന്തഃരീക്ഷത്തിലെ ഊഷ്മാവ്, ജലാംശം, വിത്തിലെ ജലാംശം എന്നിവ സൂക്ഷിച്ചുവയ്ക്കുന്ന സമയത്ത് വിത്തിന്റെ അങ്കുരണശേഷിയെ ബാധിക്കുന്ന പ്രധാന ഘടകങ്ങളാണ്. കുറഞ്ഞ ഊഷ്മാവും ഈർപ്പം കുറഞ്ഞ അന്തരീക്ഷവുമാണ് കൂടുതൽ കാലം വിത്തുസൂക്ഷിക്കാൻ നല്ലത്. കാലവർഷക്കാലത്ത് സൂക്ഷിച്ചുവെക്കുന്ന വിത്തിലും കായ്കളിലും പലതരം പൂപ്പലു കളും കീടങ്ങളും കടന്നുകൂടാറുണ്ട്.
- 6% മുതല്‍ 8% മാത്രം ജലാംശം നിലനില്ക്കുന്ന വിധത്തിൽ ഉണക്കിയെടുത്ത വിത്ത് കട്ടിയുള്ള (700 ഗേജ്) പോളിത്തീൻ ഉറകളിലോ പ്ളാസ്റ്റിക് പാത്രങ്ങളിലോ വായു കടക്കാത്തവിധം സൂക്ഷിക്കാം. ഒരു കി.ഗ്രാം വിത്തിന് 2.5 ഗ്രാം കാപ്റ്റാൻ, 2.5% തിറാം ചേർത്ത് വായുകടക്കാതെ അടച്ചുവെച്ചാൽ വിത്ത് കേടുകൂടാതിരിക്കും. എയർ കണ്ടീഷൻ ചെയ്ത മുറികളിൽ കട്ടിയുള്ള പ്ളാസ്റ്റിക് കവറുകളിലാക്കിവച്ചാല്‍ വിത്തുകൾ കൂടുതൽ കാലം കേടുകൂടാതെ സൂക്ഷിച്ചുവയ്ക്കാം.
- വിത്തിന്റെ ഗുണനിലവാരം ഉറപ്പുവരുത്തുന്നതിനുവേണ്ടി വിത്തുചാക്കുകളിൽ ലേബലൊട്ടിച്ച്, ടാഗിട്ട് സീൽ ചെയ്യേണ്ടത് സീഡ് ആക്ട് പ്രകാരം നിർബന്ധമാണ്. വിൽപ്പനയ്ക്കുള്ള ഫൗണ്ടേഷൻ വിത്തിലും സാക്ഷ്യപ്പെടുത്തിയ വിത്തിലും ശുദ്ധമായ വിത്തിന്റെ അളവ്, അങ്കുരണശേഷി, മണൽത്തരികൾ, മൺകട്ടകൾ എന്നിവയുടെ അളവ് മറ്റ് വിളകളുടെയും കളകളുടെയും വിത്ത് എന്നിവ രേഖപ്പെടുത്തേണ്ടതുണ്ട്. ഫൗണ്ടേഷൻ വിത്തിലും സാക്ഷ്യപ്പെടുത്തിയ വിത്തിലും ഉണ്ടാകേണ്ട ശുദ്ധമായ വിത്തിന്റെ ഏറ്റവും കുറഞ്ഞ അളവും അങ്കുരണശേഷിയും പരമാവധി ഉണ്ടാകാവുന്ന കലർപ്പുള്ള വിത്തും മറ്റും ഓരോ വിളകളിലും നിഷ്കർഷിച്ചിട്ടുണ്ട്.
(അവലംബം: വിളപരിപാലന ശുപാര്‍ശകള്‍ 2017, കേരള കാർഷികസര്‍വ്വകലാശാല)